عزيزتى ماما
هى سلسلة من النصائح النفسية الخفيفة هيقدمهالكم موقع جوزال يوميا
عن كيفية التعامل مع طفلك و تقويم سلوكه بدون ما تعرضيه لأذى نفسى بغير قصد
بيقدمها دكتور أحمد ابو الوفا ، اخصائى الطب النفسى و طب نفسى الاطفال، أخصائى الطب النفسى بمؤسسة الرخاوى للطب النفسى و علاج الادمان.
دكتور احمد ابو الوفا
الحلقة الثالثة :
يناقش فيها دكتور احمد ابو الوفا كيفية التعامل مع بكاء و صراخ طفلك و تهدئته بدون الاضرار بشخصيته، و ايضا بدون التأثير عليك و ارهاق أعصابك معه.
نصيحة اليوم :
” عزيزتى ماما، حوالين سن السنتين الطفل بيبدأ يكون عنده شخصية بيحاول يستقل بنفسه و يهرب من أى اوامر بتديهاله، بدل ما تفضلى تكررى نفس الطلب و تحسى أنه مش سامعك خالص، فتبدأى تصرخى او تهددى انك هتحرميه من اى حاجه، ممكن تغيرى طريقة الطلب، بحيث الطفل يحس انك مش بتأمريه متفهماه فى اللحظة دى، مثلا لما يصرخ فى العربية متقوليلوش بطل صريخ و الا هلف و ارجع، فى اللحظه دى ممكن نغير دا و نقول انا هركن على جنب علشان انا مش هعرف اسوق و انت بتصرخ فلما تهدى هنكمل المشوار، دا هيخلى طفلك عارف ان فى نتايج بتترتب على السلوك اللى بيعمله.
مثال تانى فى السوبر ماركت بلاش تزعقى و تهددى انك هتحرميه من شراء اى حاجه او مش هتاخديه معاكى تانى، حاولى تلهيه فى عملية الشراء نفسها باقتراح انه يدور معاكى على اى حاجه بتشتريها مثلا زيت، سكر، زبادى .
فى الوقت دا هيحس انه فى مهمه و بيشاركك الحاجه اللى بتعمليها و هيسمع صوتك اكتر بكتير مما لو كنتى بتزعقى”.
